We are Cygnus

အအိပ်ပျက်သော ကျနော် ဒီရက်ပိုင်းမှာ အအိပ်မက်နေခဲ့၏။ စိတ်က မအိပ်ချင်သော်လည်း ကိုယ်က အိပ်ဖို့ပဲ တောင်းဆို လိုလား နေခဲ့၏။ ဆေးအရှိန်ကြောင့် ဖြစ်မည်။ အစောပိုင်းက တောက်လျောက် အအိပ်ပျက်၊ မပြည့်မှုတွေကား ခုမှ စုပြုံပြီး အတိုးယူကြလေတော့၏။ ခု သောက်နေသည့် ဆေးတွေက လူကို လေးပြီး ငြိမ်သွားစေ၏။ မလှုပ်ချင် မကိုင်ချင်နဲ့ ခွေပဲ ခွေနေချင်မိ၏။ အတော်ဆိုးသည့် ဆေးတွေပင်။ ဆေးသွားထိုးလိုက်ရင်တောင် ခုလောက်ထိ မဖြစ်ဘူး ထင်။ နို့ပေမယ့် ကိုယ် ကိုယ်တိုင်က ဆေးမထိုးချင်မှတော့ ခံရုံပေါ့။

အိပ်တာတော့ အတော် အိပ်၏။ အိပ်ပြီးရင်း အိပ်ချင်နေ၏။ ညဖက်တွေမှာ စောစော အိပ်ဖြစ်သည့်အပြင် မနက်ဆိုလည်း တော်တော်နဲ့ မနိုးပေ။ နေ့လည်နေ့ခင်းမှာပါ ထပ်ပြီး အိပ်ချင် နေပြန်သေး၏။ ခက်တော့ ခက်သား။ လုပ်စရာလည်း အထူးအထွေ မရှိနေတာနဲ့ အိပ်ပြီးလည်း အိပ်ကွာ ဆိုပြီး အိပ်ပေးလိုက်၏။ ဒါနဲ့ပဲ အိပ်ရေး အဝလွန်ပြီး ပိုလို့ပိုလို့ လေးလေးလံလံကြီး ဖြစ်နေတော့၏။ ဒီဆေးတွေ ဆက် မသောက်ရတော့မှပဲ လူလည်း ပြန်လည် လန်းဆန်း မည်ထင်။ ခုတော့ အိပ်ချည်း အိပ်နေတော့ ၏။ ပိုစ့်တင်ဖို့ စာရေး ပြီးတော့ အိပ်၊ နိုးတော့ စား ဒါနဲ့ပဲ လုံးခြာလည်လိုက်လို့ နေတော့၏။

ဘာပဲပြောပြော ကျန်းမာရေးကို ပြန်ဂရုစိုက်ရပေလိမ့်မည်။ ကျနော်တို့ ခန္ဓာကိုယ်က မကြာခဏတော့ ထိုသို့ သတိပေးတက်၏။ နေချင်သလို နေပစ်လိုက်သည်နှင့် သူက ခုလိုမျိုး သတိပေးလေ့ ရှိ၏။ ခပ်ပါးပါး သတိပေးလို့မှ မရရင်တော့ ပြင်းပြင်းထန်ထန် သတိပေးလေ့ ရှိ၏။

ခုတော့ တပတ်လုံး မနက်ပိုင်း တိုက်ကွမ်ဒို သွား မကစား ဖြစ်တော့ပေ။ Wednesday Futsal တော့ သွား ကန်ဖြစ်၏။ ဒါတောင် ခဏလောက်ပဲ ကစား ဖြစ်၏။ Futsal က မသွားလို့ မဖြစ်ပေ။ ကိုယ်က Team leader (Captain) ဆိုတော့ ကား... ဟီးဟီး။ မရှိ မဖြစ်ရယ်လို့တော့ မဟုတ်ပါ၊ ကျနော် ရှိရင် ဘာရယ်မဟုတ် အားပိုရှိပြီး ပိုများ ပျော်ကြမယ် ထင်လို့ပါ။ အမှန်တော့ ကျနော်မှရယ် မဟုတ် ကန်နေကြသူတွေ မလာရင် အတော် သိသာ၏။ ဆုံနေကြသူတွေ မဆုံဖြစ်ရင် မျှော်နေမိတတ်ကြ၏။ ထို့ကြောင့် တက်နိုင်သလောက်တော့ မပျက်မကွက်လေး သွားပေး ဖြစ်၏။ Covid ကာလ လောက်တုန်းကသာ နားဖြစ်ခဲ့ပြီး ကျန်ကာလတွေမှာတော့ ပျက်ကွက်တယ်ဆိုတာမျိုး မရှိသလောက် ရှား၏။

ဘာလိုလိုနဲ့ ကျနော်တို့ Cygnus FC Futsal အသင်းလေး ဖွဲ့စည်း ဖြစ်တာ ၅ နှစ် ပြည့်ခဲ့ပြီ ဖြစ်၏။ အသင်းက February 8, 2018 မှာ စတင်ခဲ့တာ ဆိုတော့။ အမှန်တော့ ထိုထက် စောပါ၏။ 2017 နှစ်လယ်ပိုင်းလောက်မှာ Cygnus ဆိုသည့် အမည် ပေးထားခဲ့ပြီး ဖြစ်၏။ ဒါပေမယ့် Covid ကာလမှာ ကျနော် တို့ကို နှုတ်ဆက်သွားသည့် အသင်းသား (သူငယ်ချင်း) ၏ မွေးနေ့နဲ့ ကိုက်ပြီး အသင်း မွေးနေ့၊ စတင် တည်ထောင်တဲ့နေ့ အဖြစ် သတ်မှတ် လိုက်ခြင်း ဖြစ်၏။

Once Cygnus Forever Cygnus