Football (Chapter 1)

ဘောလုံးကန်ရတာ နှစ်သက်သလို ဘောလုံးပွဲ ကြည့်ရတာကိုလည်း သဘောကျ၏။ ငယ်ငယ်ကဆို မြန်မာ့လက်ရွေးစင် အသင်း၏ ပွဲတွေကို မပျက်မကွက် ကြည့်ရှု အားပေးလေ့ ရှိ၏။ ရုပ်သံကနေ ထုတ်လွှင့်ပေးသမျှ ပွဲတွေကို မလွတ်တမ်း အားပေးခဲ့၏။ ကိုယ့်အိမ်မှာ TV မရှိတောင် ရှိသည့် အိမ်မှာ တမင် တကူးတကကို ကြည့်ပြီး အားပေးလေ့ ရှိ၏။

ဂိုးသမား အောင်ကျော်ကျော် အနီကတ် အပြခံရသည့် ဗီယက်နမ်နဲ့ ပွဲကို ခုထိ မမေ့သေးပေ။ ကျနော်တို့က ခြေစွမ်း အသာ၊ ဂိုး အသာနဲ့ ဆော့ကစား ထားနိုင်နေခဲ့၏။ ဒါပေမယ့် ပွဲ၏ အလှည့်အပြောင်းက ဗီယက်နမ် တိုက်စစ်မှူးနဲ့ အောင်ကျော်ကျော်တို့ ထိမိ၊ ခိုက်မိရာကနေ စတော့၏။ တယောက်လျော့ မြန်မာ အသင်း အနေဖြင့် ဗီယက်နမ်ကို နိုင်နေရာကနေ သရေ၊ သရေ ကနေ အရှုံးပေးရပြီး ပြိုင်ပွဲကနေ ထွက်ခွာခဲ့ရတော့၏။

၉ တန်း၊ ၁၀ တန်း အရွယ်မှာတော့ ပြည်ပက ကလပ်အသင်းတွေ အကြောင်း အတန်ငယ် တီးမိခေါက်မိနေပြီ ဖြစ်၏။ အမြဲ မဟုတ် ပေမယ့် မကြာခဏတော့ ကြည့်ရှု အားပေး ဖြစ်၏။ ၁၀ တန်း ဖြေပြီး နောက်မှသာ အပတ်စဥ် မပျက်တမ်း အားပေး ဖြစ်၏။ ကျနော် အားပေးသည့် အသင်းက မန်ချက်စတာ ယူနိုက်တက် ဖြစ်၏။

Internet တွေ၊ Wifi တွေ မရှိသေးသည့် ခေတ်မလို့ ဘောလုံးပွဲ ကြည့်လိုက စလောင်းစက်တွေကိုသာ အားကိုးရ၏။ skynet တွေ ဘာတွေ မပေါ်သေး။ ၈ ပေ၊ ၆ ပေ စလောင်းကိုမှ ကုဒ်လေးတွေ ဖြည့်ဖြည့်ပြီး ကြည့်မှ ရ၏။ စလောင်း ရှိသည့် သူငယ်ချင်း အသိလည်း မရှိရကား ဘောလုံးပွဲ ပြသပေးသည့် နေရာတွေမှာ သွားကြည့်ရလေ့ ရှိ၏။

ထိုနေရာတွေက ဘောလုံးပွဲ ပြခြင်း နှင့်အတူ ပွဲတွေကိုပါ တပါတည်း လောင်းကစားပြုလို့ရ၏။ ပြောရရင် ဒိုင်ပေါ့။ လောင်းဖို့ အဓိက လုပ်ထားပေးပြီး ဘောလုံးပွဲကို အပို အနေနဲ့ ပြပေးသည့် သဘော ဖြစ်၏။ ဘောလုံးပွဲ ကြည့်ရင်း လောင်းကြသူတွေလည်း ရှိသလို မကြည့်ဘဲ (သူ့သူ အိမ်ပြန်ကြည့်) လောင်းကြသူတွေလည်း ရှိ၏။ Phone ဆက်ပြီး လောင်းသူတွေလည်း ရှိ၏။ Mobile phone တွေ မတွင်ကျယ်သေးရကား ကြိုး phone နဲ့သာ ဆက်ကြသည်က များ၏။

ဆက်ရန်